Nga 11 prilli, procesi gjyqësor kundër ish-krerëve të UÇK-së në Hagë, hyri në një fazë të rëndësishme.
Nga kjo datë nisi dëgjimi i dëshmitarëve të Prokurorisë.
Prej atëherë, gjërat nuk kanë shkuar plotësisht ashtu siç ka planifikuar trupi gjykues.
Prandaj, Charls Smith, që drejton kolegjin e gjyqtarëve, të hënën i kërkoi Prokurorisë që ta shkurtoj kohën e marrjes në pyetje të dëshmitarëve, duke lëshuar edhe tre urdhëra gojor.
Për avokatin Artan Çerkini, vërejtja e Smith ishte me vend.
“Në secilin rast kur të pandehurit janë në paraburgim gjatë zhvillimit të procesit gjyqësor, gjykata duhet t’i kushtoj rëndësi të madhe parimit të efikasitetit, në mënyrë që procedura gjyqësore të zhvillohet në mënyrë të përshpejtuar, sepse në burg, të privuar nga liria po janë duke u mbajtur njerëz për të cilët nuk ka një vendim gjyqësor të prerë për fajësinë e tyre”, ka thënë avokati, Artan Çerkini.
Trupi gjykues, avokati Çerkini tregon se mund të marrë edhe një vendim tjetër të rëndësishëm, të shkurtoj kohën e paraparë për përfundim të gjykimit në shkallë të parë.
“Kjo çështje i është lënë në diskrecion trupit gjykues, posaqërisht kryetarit të trupit gjykues sepse ai është menaxher i procesit dhe ai duhet ta vlerësoj interesin e drejtësisë që të administrohen provat, mirëpo edhe interesin e të pandehurit për një gjykim të shpejtë dhe brenda afatit të arsyeshëm”, ka thënë Çerkini.
E zvarritjet në këtë proces, pritet të vazhdojnë.
“Ne, që nga fillimi i shqyrtimit kryesore, i kemi pasur deri më tani 26 seanca, pra nuk është që gjykimi është duke u zvarritur. Gjykimi është duke u mbajtur intensivisht, por sigurisht që volumi i dëshmitarëve dhe volumi i provave të cilat do të administrohen do ta tejzgjatë paksa këtë proces gjyqësor në të ardhmen”, ka thënë Amer Alija, avokat.
Gjatë ditës, ish-Presidenti të Kosovës, Hashim Thaçi, e ish-kryeparlamentarit, Kadri Veseli, u është vazhduar paraburgimi.
Në arsyetim është theksuar se dënimi i Salih Mustafës me 26 vjet burgim, ka rritur rrezikun dhe motivin e Thaçit dhe Veselit për të ikur.