Kombet e Bashkuara i janë bashkuar Bashkimit Evropian për të dënuar vendimin e Twitter, për të pezulluar disa gazetarë që mbulojnë firmën e mediave sociale.
OKB-ja shkroi në Twitter se liria e medias “nuk është një lodër”, ndërsa BE-ja e ka kërcënuar Twitter-in me sanksione, shkruan BBC.
Një zëdhënës i Twitter tha për një faqe interneti të lajmeve teknologjike në SHBA se, ndalimet kishin të bënin me ndarjen e drejtpërdrejtë të të dhënave të vendndodhjes.
Melissa Fleming, nënsekretarja e përgjithshme e OKB-së për komunikimet globale, tha se ishte “thellësisht e shqetësuar” nga raportet se gazetarët po pezulloheshin “arbitrarisht” nga Twitter.
“Liria e medias nuk është një lodër”, tha ajo.
“Shtypi i lirë është gurthemeli i shoqërive demokratike dhe një mjet kyç në luftën kundër dezinformatave të dëmshme”, u shpreh ajo.
Më herët të premten, komisionerja e BE-së, Vera Jourova, kërcënoi Twitter-in me sanksione sipas Aktit të ri të Shërbimeve Dixhitale të Evropës, i cili tha se kërkon “respektimin e lirisë së medias dhe të drejtave themelore”.
“Elon Musk duhet të jetë i vetëdijshëm për këtë. Ka vija të kuqe. Dhe sanksione, së shpejti,” shtoi ajo.
Musk nuk ka komentuar drejtpërdrejt mbi pezullimet, por tha në një postim në Twitter se “të më kritikosh gjatë gjithë ditës është krejtësisht mirë, por të mashtrosh vendndodhjen time në kohë reale dhe të rrezikosh familjen time nuk është”.
Manjati i teknologjisë më vonë ngriti një sondazh, duke pyetur nëse ai duhet të pezullojë llogaritë “tani” ose “për shtatë ditë”, duke sugjeruar se vendimi mund të anulohej më shpejt sesa më vonë.
“Të njëjtat rregulla doksimi zbatohen për ‘gazetarët’ si për të gjithë të tjerët,” shtoi ai, duke përdorur një term për të përshkruar lëshimin e informacionit privat në internet për individët.
Një zëdhënës i New York Times i quajti pezullimet “të dyshimta dhe të pafat”.
Pezullimet vijnë pasi Musk u zotua të padisë pronarin e një profili që gjurmon avionin e tij privat.
Ai tha se një “përndjekës i çmendur” kishte përdorur ndarjen e drejtpërdrejtë të vendndodhjes, për të gjetur dhe për të kapur një automjet që mbante fëmijët e tij në Los Anxhelos.
Por pas pezullimeve, Ministria e Jashtme gjermane paralajmëroi Twitter se “liria e shtypit nuk mund të ndizet dhe fiket sipas dëshirës”.
Pezullimi i gazetarëve në Twitter nga Elon Musk ka shkaktuar reagime globale
Twitter-i i Elon Musk pezullon llogaritë e gazetarëve të CNN, NYT, WaPo