Një zyrtar qeveritar ka thënë se Ukraina është duke forcuar mbrojtjen e kufirit të saj me Bjellorusinë nga frika se Rusia mund të jetë duke përgatitur një sulm të ri.
Zëvendësministri i Brendshëm i Ukrainës, Yevhen Yenin ka thënë për BBC se Ukraina do të forcojë kufirin me Bjellorusi me forca të armatosura dhe municione. Ky lajm ka ardhur ndërsa presidenti rus, Vladimir Putin ka udhëtuar për në Minsk për të takuar presidentin bjellorus Aleksandër Lukashenko.
Presidenti rus më vonë ka urdhëruar forcimin e kufijve të Rusisë dhe të kontrollit social brenda Rusisë. Ai shtoi se shërbimet e sigurisë duhet të pengojnë shpejt çdo përpjekje për të shkelur kufijtë e Rusisë, për të luftuar rreziqet që vijnë nga jashtë dhe për të identifikuar tradhtarët dhe sabotatorët.
Putin ka theksuar se shërbimet speciale duhet të garantojnë sigurinë e njerëzve që jetojnë në pjesët e Ukrainës që Rusia i pretendon si të sajat. Në disa prej këtyre zonave, veçanërisht në Kherson, Rusia kohët e fundit ka pësuar ndryshime të rëndësishme ushtarake, raporton CNN.
Ministria ruse e mbrojtjes ka njoftuar se trupat e saj të vendosura në Bjellorusi do të kryejnë stërvitje të përbashkëta ushtarake me Bjellorusinë. Duke reaguar ndaj kësaj dhe vizitës, zëvendësministri i Brendshëm i Ukrainës, Yenin ka konfirmuar se “Ne po ndërtojmë linjat tona të mbrojtjes në të gjithë kufirin me Rusinë dhe me Bjellorusinë”.
Ndërsa Bjellorusia nuk është përfshirë drejtpërdrejt në luftë, ajo ka lejuar trupat ruse të përdorin territorin e saj për të nisur pushtimin në shkurt.