Forcat izraelite kanë vrarë dhjetëra sulmues palestinezë dhe kanë ndaluar shumë të tjerë në operacionet e zhvilluara në 24 orët e fundit në Han Junis – qytetin që ndodhet në jug të Gazës, ka thënë ushtria në një deklaratë të martën.
Qytetin jugor, ushtria e ka përshkruar si fokus të luftimeve, derisa ka bërë të ditur se ka ndaluar rreth 80 persona.
Sipas ushtrisë izraelite, në mesin e të ndaluarve ka persona të cilët akuzohen për pjesëmarrje në vrasjet dhe rrëmbimet e 7 tetorit në jug të Izraelit.
Më 7 tetor 2023 grupi palestinez Hamas, i shpallur organizatë terroriste nga Shtetet e Bashkuara dhe Bashkimi Evropian, ka sulmuar Izraelin duke vrarë 1.200 persona – shumë prej tyre civilë, dhe duke rrëmbyer rreth 250 të tjerë.
Si pasojë e ofensivës izraelite, në Rripin e Gazës janë vrarë mbi 27.000 persona, sipas Ministrisë së Shëndetësisë në Gazën e udhëhequr nga Hamasi. Kjo ministri, që nuk bën dallimin në mes të luftëtarëve dhe civilëve të vrarë, ka thënë se shumica e viktimave ishin gra dhe fëmijë.
Izraeli ka vazhduar ofensivën e tij në jug të Gazës edhe gjatë fundjavës, duke paralajmëruar se forcat tokësore mund të përparojnë drejt qytetit Rafah, si pjesë e fushatës së tyre për të zhdukur Hamasin, raporton REL.
Në përpjekje për të arritur një marrëveshje të re armëpushimi në luftën në mes të Izraelit dhe Hamasit, sekretari amerikan i Shtetit, Antony Blinken, ka udhëtuar të hënën për në Lindjen e Mesme.
Ai pritet të vizitojë Arabinë Saudite, Izraelin, Egjiptin dhe Katarin gjatë turneut të tij të pestë në rajon, prej kur nisi lufta.
Një armëpushim ishte propozuar gjatë një takimi në janar, të mbajtur në Paris, në mes të zyrtarëve të lartë të SHBA-së, Izraelit, Egjiptit dhe Katarit.
Armëpushimi i propozuar parasheh një pauzë të luftimeve, fillimisht për gjashtë javë që Hamasi të lirojë pengje në këmbim të të burgosurve palestinezë që mbahen nga Izraeli.