Edhe sot do të vazhdojë procesi gjyqësor ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit.
Akoma nuk është bërë e ditur nëse seanca e sotme do të jetë e hapur apo e mbyllur për publikun.
Thaçi, Veseli, Krasniqi dhe Selimi akuzohen për veprat: përndjekje, burgim, torturë, vrasje dhe zhdukje me forcë të personave.
Sipas aktakuzës, krimet e pretenduara të tyre janë kryer nga muaji mars i vitit 1998 deri në shtator të vitit 1999 në disa zona në Kosovë dhe në disa në veri të Shqipërisë.
Prokuroria pretendon se shumica e viktimave të të akuzuarve – rreth 100 syresh – janë shqiptarë, porse ka edhe serbë dhe romë të Kosovës.
Gjyqi ndaj Thaçit dhe tre të të akuzuarve të tjerë është rasti i profilit më të lartë në Gjykatën Speciale, që lidhet me luftën e viteve 1998/99 në Kosovë.
Deri më tani, kjo gjykatë ka dënuar me 26 vjet burgim ish-pjesëtarin e Ushtrisë Çlirimtare të Kosovës, Sali Mustafa, ndërsa me nga katër vjet e tre muaj i ka dënuar dy anëtarët e Shoqatës së Veteranëve të Luftës së UÇK-së, Hysni Gucati dhe Nasim Haradinaj, të cilët janë gjykuar për nxjerrjen e emrave të dëshmitarëve në raste të tjera.
Gjykata Speciale në Hagë, më katër tetor, e ka miratuar kërkesën për të lejuar tre anëtarë të ngushtë të familjes së njërës prej viktimave, që ka ndërruar jetë së fundmi, të marrin pjesë si viktima pjesëmarrëse në proces gjyqësor.
Mbrojtësi i viktimave parashtron se tre të afërmit e ngushtë të V252/06 duhet të lejohen të marrin pjesë si viktima në procedurat aktuale në emër të V252/06.5.
“Më 8 shtator 2023, avokati i viktimave njoftoi Panelin për vdekjen e V252/06 dhe paraqiti një kërkesë për të lejuar tre nga të afërmit e ngushtë të V252/06 të merrnin pjesë si viktima në procedurat në vend të V252/06 (“Kërkesë”)”, thuhet në njoftim.
Avokati i viktimave pohon se ai ka të drejtë të paraqesë kërkesën aktuale, duke qenë se ai ishte caktuar më parë për të përfaqësuar V252/06.