Seanca e Thaçit dhe të tjerëve ka vazhduar të premten me dëgjimin e dëshmitarit të katërt, i cili është duke u përgjigjur në kudërpyetjet e mbrojtjes në seancë private.
Paraprakisht, trupi gjykues ka dhënë një urdhër me gojë, po ashtu në seancë private.
Të enjten kishin përfunduar pyetjet për dëshmitarin e katërt në seancë private në rastin ndaj Hashim Thaçit, Kadri Veselit, Jakup Krasniqit dhe Rexhep Selimit, shkruan “Betimi për Drejtësi”.
Ndërkaq, për sot ishte planifikuar të fillojnë kundërpyetjet nga mbrojtësit.
Po ashtu të enjten, trupi gjykues kishte rrëzuar kërkesën e mbrojtjes së Krasniqit për përkthimin e shënimeve paraprake të ZPS-së.
Gjatë seancës së 10 majit 2023, mbrojtësi i Jakup Krasniqit, avokati Aidan Ellis, kishte kërkuar që dokumentet e dorëzuara nga Prokuroria, të përkthehen në gjuhën shqipe, pasi sipas tij, Krasniqi nuk di të lexojë në gjuhën angleze.
Gjatë muajit prill ka filluar gjykimi, ndërsa në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse dhe pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi i kanë mohuar akuzat në tërësi e po ashtu edhe mbrojtësit e tyre.