Gjatë ditës së njëjtë është njoftuar se ka vdekur artisti shqiptar, mjeshtri i arteve të bukura, profesori Shyqri Nimani.
Këtë e ka bërë të ditur djali i tij, Agon Nimani, i cili gjithashtu ka njoftuar edhe për ceremoninë mortore.
“E premte, 23 qershor 14:00-15:00h Homazh në foajenë e Teatrit Kombëtar të Kosovës (Pallati i Rinisë).
15:00-16:00h Mbledhja komemorative në Teatrin Kombëtar, organizuar nga Ministria e Kulturës (amfiteatri i TKK).
17:00h Varrimi, në varrezat e Prishtinës (Arbëri).
E pamja: 24, 25, 26 qershor (e premte – diel) Rruga Major Mehmet Bushi, Vila 15/1, (Shtëpia e familjes, Bregu i Diellit) Prishtinë nga 11:00-18:00h”, ka shkruar ai në Facebook.
Gjersa, telegram ngushëllimi në momentet e para të lajmit ka bërë ministri i Kulturës, Rinisë dhe Sportit, Harjulla Çeku.
“Me pikëllim pranuam lajmin për ndarjen nga jeta të më të dashurit tuaj, mjeshtrit të arteve të bukura, profesor Shyqri Nimanit. Në emrin tim dhe të Ministrisë së Kulturës, Rinisë dhe Sportit shprehim ngushëllimet më të sinqerta për humbjen tuaj”, ka shkruar Çeku.
Çeku ka përmendur disa nga veprat e tij më të njohshme dhe më emblematike.
“Teksa kujtojmë vetëm disa nga veprat e tij, si dorëshkrimin e artë në aktin themeltar të shtetit tonë, Deklaratën e Shpalljes së Pavarësisë së Kosovës, krijimin e logos identifikuese të Grand Hotelit, Kosova Filmit deri tek simboli i Universitetit të Prishtinës, e themi me gjithë zemër se prof. Nimani me meritë të plotë e të padiskutueshme ka zënë një vend nderi në listën e gjatë të krijuesve dhe studiuesve të kohës sonë. Do t’i jemi falënderues dhe përgjithmonë mirënjohës për kontributin e tij në themelimin e departamentit të Dizajnit Grafik në Fakultetin e Arteve në Universitetin e Prishtinës, kontributin në themelimin e institucioneve tona të artit, udhëheqjen e Galerisë Kombëtare të Kosovës, si dhe për monografitë reprezentative dhe të rëndësishme mbi trashëgiminë kulturore shqiptare”, ka shtuar Çeku.