Kryeministri i Kosovës, Albin Kurti, së bashku me ministrin e Mbrojtjes, Armend Mehaj dhe ministrin e Administrimit të Pushtetit Lokal, Elbert Krasniqi, kanë vizituar fshatin Llaushë të Skenderajt, kështu ka njoftuar kryetari i komunës së Skenderajt, Fadil Nura, i cili i priti ata në komunën e tij.
Nura u shpreh se pret përkrahje nga niveli qendror.
Një vizitë e tillë erdhi me qëllim që të shihen nga afër dëmet e shkaktuara nga vërshimet dhe gjendjen e rëndë në disa zona.
“Sot me kryeministrin e Republikës së Kosovës, z.Albin Kurti dhe me ministrat z.Armend Mehaj dhe z.Elbert Krasniqi, vizituam Llaushën për të parë afër dëmet e shkaktuara nga vërshimet, që përveç ekonomitë familjare dhe bujqësia, edhe infrastruktura publike është në gjendje të rëndë, ku në disa zona është vështirësuar qarkullimi dhe furnizimet. Dëme të konsiderueshme u shkaktuan edhe në fermën e pulave”, ka shkruar Nura në llogarinë e tij në Facebook.
Ndër të tjera, Nura ka theksuar se familjet e prekura në Skenderaj kanë nevojë për përkrahjen e nivelit qendror.
“Familjet e prekura dhe Skenderaj në tërësi, në këtë gjendje çfarë ndodhen pas përmbytjeve, kanë nevojë më shumë se kurrë për përkrahje nga niveli qendror, që të harrohet ajo që ndodhi e të nisim nga e para”, ka shkruar Nura.