Ashtu siç kishin paralajmëruar, Organizatat e dala nga lufta e Ushtrisë Çlirimtare të Kosovës, në formë proteste janë mbledhur para Kuvendit të Kosovës për t’i shfaqur pakënaqësitë e tyre.
Turmës së protestuesve po i prin ushtruesi i detyrës i Organizatës së Veteranëve të Luftës së UÇK-së, Faton Klinaku.
Ndërkaq, Partia Social Demokrate dhe Lëvizja për Bashkim kanë bërë të ditur se do të marrin pjesë në këtë protestë.
Protestuesit po mbajnë në duar flamuj kombëtar dhe po brohorasin akronimin e Ushtrisë Çlirimtare të Kosovës.
“Le ta din mirë Albin Kurti që nuk mund të luajë me veteranët e luftës, sot i kemi veteranët duke u maltretuar në burgje të Hagës. Ne jau kemi prurë lirinë”, dëgjohet duke thënë njëri nga protestuesit
Po ashtu, kësaj proteste i ka dhënë përkrahje edhe Aleanca për Ardhmërinë e Kosovës (AAK).
Ndërkaq, në të njëjtën ditë, të hënën mblidhet edhe Kuvendi i Kosovës, ku njëra nga pikat e rendit të ditës do të jetë votimi në parim i Projektligjit për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore.
Ditë më parë, Klinaku e kishte paralajmëruar këtë protestë, për të kundërshtuar, siç kishte thënë, tentimin e pushtetit për t’i larguar veteranët nga e drejta për t’u përfshirë në ndryshimet e pagës minimale.
Lajmi në përditësim…
