I dërguari i Bashkimit Evropian për dialogun Kosovë-Serbi, Miroslav Lajçak, ka zhvilluar një takim me zyrtarë të lartë amerikanë në kuadër të diskutimeve për normalizimin e marrëdhënieve mes dy vendeve.
Në një darkë pune me ndihmëssekretarin Amerikan të Shtetit për Evropën dhe Euroazinë, James O’Brien dhe zëvendësndihmëssekretarin Amerikan të Shtetit për Ballkanin Perëndimor, Alexander Kasanof, Lajçak ka theksuar rëndësinë e një “diskutimi strategjik” mbi procesin e dialogut.
“Gjithmonë e dobishme për të pasur një diskutim strategjik për Dialogun për normalizimin e marrëdhënieve ndërmjet Kosovës dhe Serbisë dhe dinamikën rajonale me O’Brien nga DASH dhe Kasanof nga DASH”, ka shkruar Lajçak në platformën X.
Lajçak ka theksuar se pret t’i vazhdojnë diskutimet javën e ardhshme në Bruksel.
Javën që shkoi kryenegociatori i Kosovës, Besnik Bislimi dhe ai i Serbisë, Petar Petkoviq, kanë zhvilluar dy herë bisedime të ndara me Lajçakun, i cili nuk arriti t’i bindë ata për një takim trepalësh në Bruksel.