Pas disa ditëve protesta në Shkup, partia opozitare VMRO-DPMNE, ka bërë të ditur se nga dita e së premtes do të bllokojë disa rrugë kryesore në vend.
“Vazhdojmë me bllokada në mbarë Maqedoninë. Në katër vende, në Shkup para Qeverisë, si dhe bllokimi i rrugëve kryesore Shtip-Veles, Strumicë-Radovish dhe Pletvar-Prilep. I bëjmë thirrje masës që t’i thotë JO ultimatumit për bullgarizimin e Maqedonisë, JO brutalitetit dhe komisariateve, PO të ardhmes së Maqedonisë. Të shtunën nuk do të ketë protesta në shenjë respekti për bashkëqytetarët myslimanë që festojnë festën. Vazhdojmë të protestojmë masivisht në Shkup, të dielën në orën 19:00 para Qeverisë” thonë nga VMRO.
Ndryshe, VMRO ka nisur protesta kundër propozimit të modifikuar francez për normalizimin e marrëdhënieve Maqedoni e Veriut – Bullgari dhe për hapjen e negociatave me BE-në për RMV-në.
Ndërsa partia e Dimitar Kovaçevskit, LSDM ka reguar ndaj protestave të opozitës.
Ajo ato i ka quajtur se janë protesta të koalicionit anti-evropian të udhëhequra nga VMRO-DPMNE-ja dhe E Majta pro-ruse.
Sipas tyre, këta të fundit nuk janë kundër propozimit të fundit evropian, por sfondi i tyre ishte një përpjekje e pasuksesshme për të rrëzuar Qeverinë.
“Tani që informacioni për propozimin evropian është në Kuvend, të gjithë atë mund ta shohin qartë. Skenarët e përgjakshëm me krijimin e qëllimshëm të tensioneve, konflikteve, rrezikimit të stabilitetit në shtet janë në fakt një luftë për pushtet. Për qëllimet e tij personale, Mickoski, së bashku me Apasievin ishte i gatshëm të fuste në konflikt të gjithë shtetin, përmes një skenari të rrezikshëm, të errët dhe të përgjakshëm për konflikt civil dhe konflikt etnik. Nuk patën sukses këto skenarë që u ndihmuan edhe nga Aleanca”, thonë nga atje.
Ata kanë shtuar se tani është përgjegjësi e Kuvendit dhe e të zgjedhurve të qytetarëve të marrin vendim për të ardhmen.
Protesta në Shkup, mbi 40 policë të lënduar dy në gjendje të rëndë