Presidentja e Komisionit Evropian, Ursula von der Leyen, ka theksuar rëndësinë e rritjes së shpenzimeve për mbrojtjen dhe përgatitjeve për sfidat e mundshme në të ardhmen.
Pas përfundimit të samitit të liderëve evropianë në Londër, ajo ka deklaruar se Evropa duhet të jetë e gatshme për çdo skenar.
“Tani është me rëndësi të madhe që të rrisim shpenzimet… është e rëndësishme që të përgatitemi për më të keqen”, ka thënë ajo për BBC.
Von der Leyen ka theksuar se gjatë takimit u diskutua nevoja për garanci të fuqishme të sigurisë, me fokus në forcimin e pozitës së Ukrainës dhe sigurimin që ajo të ketë mjetet e nevojshme për t’u mbrojtur.
Ajo ka dërguar edhe një mesazh për presidentin e SHBA-së, Donald Trump, duke nënvizuar përkushtimin e Evropës ndaj vlerave demokratike dhe sigurisë globale.
“Ne jemi të gatshëm, së bashku me ju, për të mbrojtur demokracinë, për të mbrojtur parimin se ekziston një shtet ligjor dhe që nuk mund të pushtosh fqinjin tënd apo të ndryshosh kufijtë me forcë,” ka deklaruar ajo.
Von der Leyen gjithashtu ka theksuar se është në interesin e përbashkët të Evropës dhe botës që të parandalohen konfliktet e ardhshme.