Është arrestuar i dyshuari V.J, 22-vjeçar, nën dyshimin se i njëjti kishte shtënë me armë zjarri në drejtim të një veture ishte larguar në drejtim të panjohur.
Përmes një njoftimi, Policia e Kosovës ka njoftuar se ngjarja ka ndodhur mbrëmjen e së premtes në Mitrovicë dhe përpos dëmeve materiale, nuk ka të lënduar. Ndërkaq, nga ana e PK-së, vepra është cilësuar si “vrasje në tentativë”.
“Si rezultat i veprimeve operative e hetimore njësitet policore kanë identifikuar dhe arrestuar një person të dyshuar për veprën penale “Vrasje në tentativë”. Vepra penale ka ndodhur mbrëmë rreth orës 21:45, në rrugën “Shaban Polluzha” në Mitrovicë, ku nga një veturë në lëvizje është shtënë me armë zjarri në drejtim të veturës së ankuesit dhe ishte larguar në drejtim të panjohur. Përveç dëmeve materiale në veturën e ankuesit nuk raportohet për persona të lënduar”, thuhet në njoftim.
Krahas kësaj, PK ka njoftuar se në vendin e ngjarjes janë gjetur dhe konfiskuar dy gëzhoja. Ndërkaq, të dyshuarit i është konfiskuar një armë.
“Lidhur me rastin, në cilësi të provave materiale në vendin e ngjarjes janë gjetur dhe konfiskuar dy gëzhoja. Ndërsa si rezultat i ndërveprimeve policore pas dy orëve nga njësia policore e Trafikut Rrugor në zonën e Skenderajt është identifikuar dhe arrestuar i dyshuari V. J., 22 vjeçar, tek i cili është gjetur dhe sekuestruar një armë e llojit pistoletë e cila dyshohet të jetë përdor në veprën penale”, thuhet në njoftim.
Pas intervistimit, me vendim të prokurorit të rastit të dyshuarit i është caktuar masa e ndalimit për 48 orë.
Ndërkaq, në raportin 24-orësh të Policisë së Kosovës, thuhet se viktima kishte raportuar se në drejtim të tij kishin shtënë dy persona.
“Rr. Shaban Palluzha, Mitrovicë 20.01.2023-21:45. Viktima mashkull kosovar ka raportuar se dy persona të panjohur nga vetura në lëvizje kanë shtënë me armë zjarri në drejtim të tij, ku si pasoj vetura është goditur dy plumba. Njëri nga të dyshuarit është arrestuar dhe nga i njëjti është konfiskuar një pistoletë me dy fishekë që dyshohet të jetë përdorur në rast. Me vendim të prokurorit, i dyshuari është dërguar në mbajtje ndërsa i dyshuari tjetër gjendet në arrati”, thuhet në raport.