Rishikimi i Kodit Penal të Kosovës, po shihet si zgjidhje e Qeverise për të ulur numrin e vrasjeve të grave e rasteve të dhunës në familje.
Në fillim të mbledhjes së qeverisë, kryeministri i Kosovës, Albin Kurti në fjalimin e tij foli edhe për dy vrasjet e fundit që ndodhën në Kosovë, duke lënë fajtor sistemin gjyqësor e prokurorial.
“Ajo që ndodhi të premten dhe të martën, këto krime kundër grave, tregojnë pasojat e ndëshkimeve të ulëta e jo rrallë herë mosndëshkueshmërisë. Tregojnë dështimin e sistemit gjyqësor e prokurorial për vendosje të drejtësisë në shtetin tonë. Dënimet e mangëta, janë shkelje mbi të drejtat e viktimave. Këto, të mbuluara me mungesën e llogaridhënies dhe transparencës në detyrë nga sistemi i drejtësisë, nuk falen nga qytetarët tanë. Si zë i tyre kemi përgjegjësinë të ndërmarrim masa për të vendosur llogaridhënien aty ku është e domosdoshme, e për të kërkuar drejtësinë, me çdo kusht aty ku ajo mungon”, ka deklaruar Kurti.
Kritika për sistemin e drejtësisë pati edhe ministrja e këtij dikasteri, Albulena Haxhiu, e cila tregoi edhe për veprimet që janë duke menduar t’i bëjnë.
“Për shkak të shkallës së ultë ndëshkimore dhe mosveprimit të sistemit prokurorial në raport me personat e dyshuar për armëmbajtje pa leje, neve na duhet që të rishikojmë këtë dispozita në mënyrë që te pamundesojmë që prokurorët t’i neglizhojnë këto raste. Në dy rastet e fundit ka pas armëmbajtje pa leje”, ka deklaruar Haxhiu.
Kryeministri Kurti, në adresimin e tij në këtë mbledhje, foli edhe për krimet e luftës, tek kërkoi nga Serbia që të hapen disa arkiva, për të pagjeturit.
“Duke u mbështetur në marrëveshjen e arritur më 2 maj të vitit të kaluar në Bruksel në takimin e nivelit të lartë, e përsërisim kërkesën për hapje të arkivave të Brigadës së 37-të të Motorizuar të Ushtrisë Jugosllave, përgjegjëse kryesore për shumë masakra në rajonin e Drenicës dhe për fatin e shumë personave të zhdukur në këtë rajon. Na duhet e vërteta e plotë, na duhet përgjegjësia komanduese dhe ekzekutuese, na duhet drejtësia institucionale gjyqësore”, ka thënë Kurti.
Në këtë mbledhje të qeverisë u miratuan 15 pika, ndër to një vendim që lidhet me shpronësimin e pronave të paluajtshme të cilat preken nga zgjerimi i rrugës nacionale, Kijevë – Zahaq, e propozim vendimi për themelimin e Parkut Industrial dhe Teknologjik në Podujevë, me kohëzgjatje prej 99 viteve.