Një recepsionist i një hoteli në Dhërmi është vrarë dhe trupi i tij është zhdukur njofton Policia e Shtetit.
Siç thuhet nga Policia shqiptare, pas raportimit se janë humbur kontaktet me viktimën, janë nisur menjëherë kontrollet, ku nga veprimet hetimore mendohet se E. N., është qëlluar me armë zjarri rreth orës 00:30 nga shtetasi G. Sh., 43 vjeç, lindur në Tepelenë dhe banues në Angli.
Si njofton Policia, 42-vjeçari dyshohet është larguar drejt Greqisë. Deri në këto momente, sipas policisë, janë shoqëruar për t’u pyetur në lidhje me këtë ngjarje, 19 persona.
“Më datë 06.06.2024, Policia ka marrë njoftim se në Dhërmi, Himarë, shtetasi E. N., 31 vjeç, banues në Tiranë, punonjës në recepsionin e një hoteli në Dhërmi, Himarë, kishte humbur kontaktet me pronarët e hotelit. Me marrjen e njoftimit, Drejtoria Vendore e Policisë Vlorë dhe Komisariati i Policisë Himarë kanë ngritur një grup hetimor, në drejtimin e Prokurorisë së Juridiksionit të Përgjithshëm Vlorë.
Shërbimet e Policisë dhe grupi hetimor kanë shkuar në hotel dhe kanë kryer një sërë veprimesh hetimore. Nga veprimet hetimore dyshohet se shtetasi E. N. është qëlluar me armë zjarri, rreth orës 00:30, nga shtetasi G. Sh., 43 vjeç, lindur në Tepelenë dhe banues në Angli. Nga veprimet e tjera hetimore rezulton se pas ngjarjes shtetasi G. Sh. është larguar drejt Greqisë. Janë administruar në cilësinë e provës materiale, prova ligjore, si dhe janë shoqëruar deri në këto momente, për t’u pyetur në lidhje me këtë ngjarje, 29 shtetas. Nga tërësia e veprimeve të deritanishme dyshohet se kemi të bëjmë me një ngjarje të rëndë kriminale”, thuhet në njoftim, shkruan “Euronews Albania“.