Presidenti i Serbisë, Aleksandër Vuçiq, e ka pranuar ftesën e përfaqësuesit të lartë të Bashkimit Evropian, Josep Borrell, për të shkuar në një takim urgjent në Bruksel.
Megjithatë, ai ka thënë se do të bisedojë me Borrellin, por jo edhe me Kurtin.
“Nuk ka asgjë për të diskutuar me të. Kjo bisedë nuk ka kuptim. Ai mban predikime për Enver Hoxhën, Adem Demaqin, Marksin, për çështjet e brendshme politike në Serbi”, ka thënë Vuçiq, shkruan Danas.
Një ditë më parë, Kurti ka konfirmuar pjesëmarrjen në takimin e Brukselit.
Ai tha se në atë takim do të insistojë “lirimin e menjëhershëm dhe pa kushte të tre policëve [të Kosovës] që po mbahen peng nga Serbia, shtensionimin e situatës dhe normalizimin e raporteve”.
Ndërkaq, përfaqësuesi i lartë i Bashkimit Evropian për politikë të jashtme dhe siguri, Josep Borrell, tha se ka ftuar liderët e Kosovës dhe Serbisë në një takim urgjent në Bruksel, për gjetjen e një zgjidhjeje për krizën aktuale.
“Kam ftuar liderin e Serbisë, Aleksandar Vuçiq, dhe atë të Kosovës, Albin Kurti, në Bruksel për takime urgjente për të gjetur një mënyrë për të dalë nga kriza aktuale. Na duhet shtensionim i menjëhershëm i situatës dhe zgjedhje të reja në veri me pjesëmarrjen e serbëve të Kosovës. Këto janë parësore për rajonin dhe BE-në”, shkroi ai në Twitter.
Borrell i fton në takim Kurtin dhe Vuçiqin: Kemi nevojë për deeskalim të menjëhershëm