Presidenti i Serbisë, Aleksandër Vuçiq, ka reaguar në lidhje me vizitën e të birit të tij, Danilos që e ka bërë në Graçanicë sot për Vidovdan, që kishte të veshur një bluzë me mbishkrimin “Dorëzimi nuk është opsion”.
“T’u them se këtë mendon secili nga ne Vuçiqët, se kështu mendon pjesa më e madhe e Serbisë dhe se për ne dorëzimi nuk është opsion”, ka thënë Vuçiq, shkruan Novosti.
Ndryshe, i biri i presidentit serb, Aleksandër Vuçiq, është parë në Graçanicë, aty ku po mbahen festimet e Vidovdanit këtë vit.
Ai ka marrë pjesë në liturgjinë fetare për Vidovdan.
Siç tregojnë pamjet e siguruara nga RTV Dukagjini, Danilo Vuçiq është spikatur në Graçanicë, gjersa burimet tregojnë se ai kishte edhe sigurimin me të.
Dhjetëra qytetarë serbë janë mbledhur në oborrin e Manastirit të Graçanicës, për të festuar Ditën e Vidovdanit, e cila festohet për çdo vit, për çdo 28 qershor.
Zakonisht, Vidovdani festohet në Gazimestan, dhjetë kilometra larg kryeqytetit, Prishtinës, por këtë vit do të mbahet në Graçanicë. Kjo, me vendim të peshkopit, Teodosije Shibaliq.
“Djemtë e Kosovës”, “Rrënjët e mia”, janë disa nga mbishkrimet në oborrin e manastirit.