Presidenti ukrainas, Volodymyr Zelensky, ka kritikuar Rusinë për sulmin vdekjeprurës të raportuar nga shërbimi i urgjencës së Ukrainës në Zaporizhzhia.
“Kështu e kalon shteti terrorist të ‘Dielën e Palmëve’”, ka thënë Zelensky, duke iu referuar festës sipas ortodoksëve lindorë, ndërsa krishterët festojnë të dielën e Pashkëve.
Të paktën dy persona u vranë kur sulmet ruse goditën qytetin jugor gjatë natës, sipas Shërbimit Shtetëror të Emergjencave të Ukrainës.
Një burrë 50-vjeçar së bashku me vajzën 11-vjeçare u vranë, pasi sulmet shkatërruan pjesërisht një ndërtesë banimi, thanë zyrtarët në Telegram.
Ekipet e shpëtimit nxorën një grua 46-vjeçare nga rrënojat, shtoi ajo, raporton CNN.
“Kjo është mënyra se si Rusia e vendos veten në izolim edhe më të madh nga bota, nga njerëzimi”, ka thënë Zelensky.
Mbrojtja ajrore e Ukrainës rrezikon t’i mbarojë raketat dhe municionet brenda javësh, sugjeron një rrjedhje e dukshme e dokumenteve të Pentagonit që datojnë nga shkurti, ndërsa zyrtarët e mbrojtjes amerikane u përpoqën të gjurmonin se si dosjet u bënë publike, raporton The Guardian.
Një nga dokumentet e datës 23 shkurt dhe i shënuar “Sekret”, përshkruan në detaje se si sistemet e mbrojtjes ajrore të epokës sovjetike të Ukrainës S-300, do të varfërohen deri më 2 maj me normën aktuale të përdorimit. Është e paqartë nëse norma e përdorimit ka ndryshuar që atëherë.
Autenticiteti i dokumenteve të Pentagonit nuk është verifikuar. Në një deklaratë të dielën, Pentagoni ka thënë se po shqyrtonte vlefshmërinë e dokumenteve të fotografuara që “duket se përmbajnë materiale të ndjeshme dhe shumë të klasifikuara”.