Është zjarr i shkaktuar nga shpërthimi i një kazani brenda termocentralit Kosova A.
Por, për shpërthimin që KEK-u njoftoi vetëm pas reagimeve të deputetëve opozitarë në Kosovë, po thonë se nuk ka vend për shqetësim.
GRAFIKË: Korporata Energjetike e Kosovës
“Korporata Energjetike e Kosovës (KEK sh.a.) njofton opinionin se nuk ka vend për shqetësim në lidhje me operimin dhe sigurinë në njësitë e TC Kosova A. Njësia A4 është ndalur për shkak të një lidhjeje të shkurtër në kabllot e matjeve, dhe është shkyçur nga puna në mënyrë të rregullt. Ekipet e mirëmbajtjes janë angazhuar që nga momenti i ndaljes së njësisë dhe po punojnë për sanimin e gjendjes, me qëllim që njësia të kthehet në operim sa më shpejt. Zjarri i raportuar në media ka ndodhur jashtë njësisë A4 dhe I njëjti është lokalizuar dhe fikur në kohë optimale nga zjarrfikësit”.
Për incidentin në KEK herën në mëngjes lajmin e bëri publik deputeti i PDK-së, Ferat Shala.
Sipas tij, lajmi u fsheh qëllimisht dhe aty pati gisht vet partia në pushtet.
“Kosova ka kapacitet prodhues minus një bllok gjithsej, bllokun A4, rreth 125-135 megavator prodhim më pak e normalisht këtë kompensim duhet ta bëjmë nga importi. Shqetësuese është shkalla e jottansparencës, e keqmenaxhimit, shkalla e situatës të rrezikshme e nbrojtjes në punë dhe kapaciteve gjeneruese në KEK. I kemi të njohura problemet, sfidat, aferat korruptive falë mediave dhe akterëve, dhe atyre që parimisht e bëjnë këtë skenar që është i dirigjuar nga struktura të caktuara të qeverisë në bashkëpunim të plotë me KEK-un, si dhe sekretariatin e LVV ku ka ndërhyrje flagrante që orientojnë KEK se si duhet shkuar në takim, me kapelë apo pa kapelë”, ka thënë Shala.
Detaje të hollësishme për rastin, pati deputeti i VV-së, Salih Zyba, ani se edhe në Kuvend nuk mbulon ndonjë fushë që lidhet me atë që ndodhi.
“Kutia e njehsorëve është djegur, nuk ka pasur eksplodim. Edhe një herë Ferat Shala tregoi se me sa padurim i ëndërron eksplodimet nëpër ndërmarrjet publike, me shpresë se pastaj mund të bërtetë: Albini i ka fajet; mafia energjetike i ka fajet. I gatshëm që me njerëzit e vet të prodhoje sabotime të shtetit e “eksplodime” vetëm për një status në Facebook dhe 10 debate televizive”, ka thënë Zyba.
Në disa mesazhe të publikuara ditë më parë, koordinatorja e komiteteve në VV, Dejona Mihali fliste në mesazhet e saj me tani ish-drejtorin e KEK-ut, Nagip Krasniqin duke miratuar publikimin e disa komunikatave publike e njëheri, urdhëronte Krasniqin të mos kishte reduktime.