Komuna e Kamenicës ka reaguar lidhur me zjarret që kanë shpërthyer në zonën Gugulloc-Bushinicë.
Në një postim në Facebook, komuna njoftoi se banorët e këtyre zonave janë jashtë rrezikut dhe se ekipet e zjarrfikësve po punojnë vazhdimisht për shuarjen e vatrave të zjarrit.
Megjithatë, ata theksuan se terreni i vështirë ka bërë që disa vatra të jenë të papërballueshme dhe se janë duke u kërkuar burime shtesë për të ndihmuar në shuarjen e zjarrit.
Po ashtu, komuna njoftoi se zjarret aktualisht ndodhin në territorin e Komunës së Artanës, dhe bëri thirrje për kujdes të shtuar nga qytetarët për të shmangur mundësitë e shkaktarëve të mundshëm të zjarreve.
“Njoftojmë të gjithë qytetarët e Komunës së Kamenicës se zjarret aktive aktualisht, janë duke ndodhur në territorin e Komunës së Artanës, më saktësisht në lokacionin Gugulloc-Bushincë. Po punohet vazhdimisht në shuarjen e zjarreve nga ekipet e zjarrfikësve, edhe pse terreni është i papërshtatshëm, disa vatra nuk mund të arrihen, si dhe ka nevojë për shtim kapacitetesh dhe ndihmë me ekipe të tjera. Është e rëndësishme të dihet se banorët që jetojnë në ato zona, janë jashtë rrezikut, si dhe po punohet edhe në këtë orë për shuarjen e të gjitha vatrave të zjarrit. Gjithashtu ky njoftim, le të jetë edhe thirrje për kujdes të shtuar nga të gjithë, duke shmangur mundësinë e ekspozimit ndaj shkaktarëve të mundshëm të zjarreve”, ka njoftuar Komuna.
Në kohët e fundit, Kosova është përballur me një numër të madh zjarresh, dhe Agjencia e Menaxhimit të Emergjencave ka shprehur dyshime se disa prej këtyre zjarreve mund të kenë qenë të qëllimshme.
Zjarre kanë shpërthyer edhe në rajone të tjera të Kosovës, përfshirë Skenderaj, Zubin-Potok, Prishtinë dhe Deçan.