Zyra e Prokurorit të Specializuar (ZPS) ka njoftuar se ka dorëzuar një aktakuzë të ndryshuar kundër Isni Kilaj, ish-komandant i Ushtrisë Çlirimtare të Kosovës (UÇK).
Kilaj, i cili u arrestua në nëntor të vitit të kaluar nën akuzat për pengim të drejtësisë, është liruar nën kushte të rrepta në maj, por ka mbetur nën hetim. Në atë kohë, lirimi i tij kërkoi një garanci financiare prej 30 mijë eurosh.
Arrestimi i Kilajt dhe ndalimi i tij në objektin e Dhomave të Specializuara të Kosovës (DhSK) në Hagë, më 3 nëntor të vitit të kaluar, pasoi akuzat për vepra penale kundër administrimit të drejtësisë.
Sipas ZPS-së, Kilaj përballet gjithashtu me akuza për pengim të personave zyrtarë në kryerjen e detyrës zyrtare dhe shkelje të sekretit të procedurave.
“Në vazhdim të njoftimit të mëparshëm lidhur me çështjen Kilaj në muajin maj, më 18 korrik ZSP-ja ka njoftuar publikisht Gjykatësen e Procedurës Paraprake se ka dorëzuar aktakuzën e ndryshuar kundër Isni Kilaht”, thuhet në njoftim.