Rreth orës 19:50, zyrtarë të Ministrisë së Financave kanë shkuar te Qendra e të moshuarve “Orenda”, në të cilën, gjatë ditës, dolën pamje ku shihej keqtrajtimi i një gruaje të moshuar nga një infermiere e moshës së re.
Në videon e postuar, shihej infermierja teksa e godiste me shuplakë në fytyrë dhe me shqelma në pjesën e barkut.
Përveç, zyrtarëve të MF-së, në objektin “Orenda”, kanë shkuar edhe zyrtarë policorë, të cilët janë ende duke qëndruar aty.
Qendra “Orenda”, bëhet e ditur se ishte e licencuar nga kjo Ministri.
Në lidhje me këtë rast, gjatë ditës, janë arrestuar tre persona, përfshirë edhe infermieren e cila shihet në video teksa ushtron dhunë fizike dhe psiqike ndaj gruas së moshuar.
Pas publikimit të këtyre pamjeve, familjarët e së moshuarës kanë shkuar në vendin ku qëndronte viktima dhe e kanë tërhequr atë nga ajo qendër.
Dhëndri i së moshuarës ka bërë të ditur se ajo vuante nga sëmundja e alzhiemerit apo sëmundja e harresës.
Ndërkaq, burime të Rtv Dukagjinit, kanë mësuar se familjarët e së moshuarës kanë vërejtur shenja dhune në fytyrën e saj, por që nuk kanë dyshuar se ato mund të kenë qenë të shkaktuara nga punëtorët e qendrës, të cilët e kishin për obligim të kujdeseshin për të.